Praktesche Guide fir unzefänken (Starter-Kit)
Wëllt Dir, als Gemeng oder als Berodungskommissioun, en éischte Projet am Beräich vun der Gläichstellungspolitik starten?
Maacht fir d’éischt e Brainstorming iwwert all Aktivitéitsberäicher, déi Dir an Ärer Gemeng fërdere wëllt, a bezitt Iech dobäi op d’Lëscht vun den Ziler aus der Europäescher Charta. Setzt Iech 3 – 5 Prioritéiten, mat deenen Dir wëllt ufänken.
Dir hutt d’Wiel tëscht verschiddene Beräicher, an et ass net ëmmer einfach, déi richteg Wiel ze treffen. Dir fannt hei ënnen eng Auswiel vun Ziler, déi Iech den Ufank méi liicht maachen. Falls néideg, kënnt Dir e Subsid vum Ministère ufroe fir Äre Projet ze finanzéieren.
-> Kuckt an dëser Optik och eise Programm MEGA PLUS, deen et virgesäit eng Conventioun tëscht de Gemengen an dem Ministère ofzeschléissen, fir séier an onkomplizéiert Mesuren a Saache Gläichstellung tëscht de Geschlechter op lokalem Plang asetzen ze kënnen.
Kampf géint d’Stereotypen
Dëst Zil erméiglecht et Iech, un Aktioune fir d’Allgemengheet ze schaffen, déi e Maximum u Leit interesséiere kéinten.
Dat kann eng Ausstellung, eng Konferenz, e Concours, e Spill oder en anert Evenement sinn, mam Zil, d’Mënschen zum Nodenken iwwert déi festgeluechte Rolle vu Fraen, vu Männer a net binäre Persounen an der Gesellschaft unzereegen.
Dir kënnt Iech och u Campagnen oder Initiative vum Ministère oder aneren Organisatiounen bedeelegen, zum Beispill un der Initiativ vum CNFL fir d’Ännere vu Stroossennimm a weiblech Nimm.
Educatioun
D’Maison Relais oder Schoule si fantastesch Plaze fir zesumme mat Kanner Aktiounen ze starten.
Fir d’Gläichstellung tëscht de Geschlechter an eiser Gesellschaft ze fërderen, ass et wichteg, bei de Jongen a Meedercher e Bewosstsinn fir d’Gläichheet vu klengem un z’entwéckelen.
Heivir bitt sech d’Sensibiliséierung iwwert op Geschlechter bezunne Stereotyppe bei deene Jonken un. Dës hëlleft hinne bei hirer Orientatioun am Liewen a stellt sécher, datt Jongen a Meedercher hir perséinlech a berufflech Entwécklung selwer wiele kënnen, onofhängeg vu Limitten, déi eis Societéit hinne wéinst hirem Geschlecht nach zouuerdne kéint.
Reservéiert Sensibiliséierungsateliere fir Är Grondschoul oder Maison Relais, oder bestellt pedagogescht Material, dat speziell fir Kanner a Jonker entwéckelt ginn ass.
Fir méi Detailer, besicht den thematesche Site vum Ministère fir Educatioun, Kanner a Jugend
Haislech Gewalt
Haislech Gewalt ka jiddereen treffen, an et ass un eis als Gesellschaft, fir ze hëllefen!
An dësem Kontext ass d'Sensibiliséierung en onverzichtbaart Mëttel vu Preventioun.
De "Preventiounstheater" weist verschidde Forme vun haislecher Gewalt, dorënner ënnert anerem Gewalt géint Fraen, Gewalt géint Männer, Gewalt géint net binär Persounen, Gewalt géint Kanner esou wéi psychologesch oder sexuell Gewalt, mam Zil opzeklären an ze sensibiliséieren!
Als Gemeng kënnt Dir den Theater buchen, an a verschiddene Kontexter an Ärer Gemeng opféiere loossen!
Fir méi Informatiounen, gitt kucken op https://violence.lu/portfolio/... oder kontaktéiert de Ministère.
Kultur a Sport
Dës Zilsetzung erméiglecht et Iech, aus engem breede Spektrum vun Aktiounen auszewielen, well Kultur, Sport- a Fräizäitaktivitéite concernéieren, op déi eng oder aner Aart a Weis, jiddereen.
Huelt zum Beispill de Sport. Dacks hu Meedercher a Jongen ënnerschiddlech Sportwelten. Dat kann zu Diskriminatioun féieren. Am Profisport sinn d’Ënnerscheeder bei de Salairen e kloren Indicateur dofir.
Als Gemeng oder Berodungskommissioun kéint Dir Aktiounen auswielen, déi den Zougang vu Meedercher a Fraen zu manner traditionelle Sportaarte fir hir Geschlecht uspriechen. Dir kéint zum Beispill Treffe mat Schüler an de Schoulen organiséieren, fir si op atyppesch sportlech Aktivitéiten a Veräiner opmierksam ze maachen, mam Zil, méi e breede Spektrum un Aktivitéiten ze presentéieren, ouni déi üblech Klischeeën ze berécksiichtegen.
Eng aner kulturell Aktioun: Vill Gemengen hu Bibliothéiken oder e Bicherschaf am ëffentleche Raum. Denkt drun, vill Bicher fir béid Geschlechter a fir all Altersgruppen zum Thema Gläichberechtegung unzebidden (Cid-Fraen a Gender).
Member ginn
Sidd Dir interesséiert , als Gemeng/Berodungskommissioun méi gewuer ze ginn?
Schéckt de Formulaire hei ënne w.e.g. komplett ausgefëllt zréck.
Mir kontaktéieren Iech dann esou séier wéi méiglech.